سرفراز احمد تیور دکھانے لگے، پی سی بی کے فیصلے کیخلاف بغاوت کردی

لاہور( مانیٹرنگ ڈیسک ) آسٹریلیا کے خلاف ون ڈے سیریز کے لیے 16 رکنی قومی اسکواڈ کا اعلان کردیا گیا ، قومی ٹیم کے کپتان عدم تحفظ کا شکار، آسٹریلیا کیخلاف سیریز کیلئے ٹیم کا حصہ نہ ہونے کے باوجود متحدہ عرب امارات جانے اور ٹیم کیساتھ رہنے کا مطالبہ کر دیا

تفصیلات کے مطابق آسٹریلیا کے خلاف ون ڈے سیریز کے لیے 16 رکنی قومی اسکواڈ کا اعلان کردیا گیا شعیب ملک ٹیم کی قیادت کریں گے۔پاکستان اور آسٹریلیا کے درمیان 5میچز پر مشتمل ون ڈے سیریز 22مارچ سے متحدہ عرب امارات میں شروع ہورہی ہے۔قومی ٹیم کے کپتان سرفراز احمد کو آرام دیا گیا ہے جن کی جگہ شعیب ملک قومی ٹیم کی قیادت کے فرائض انجام دیں گے۔آسٹریلیا کے خلاف اسکواڈ میں بلے باز عابد علی جگہ بنانے میں کامیاب رہے اور سرفراز احمد کی غیرموجودگی میں وکٹ کیپنگ کے فرائض محمد رضوان انجام دیں گے۔اسکواڈ میں شامل دیگر کھلاڑیوں میں امام الحق، شان مسعود، عمر اکمل، حارث سہیل، عماد وسیم، فہیم اشرف، محمد عامر، جنید خان، محمد عباس، عثمان خان شنواری، یاسر شاہ، سعد علی اور محمد حسنین شامل ہیں۔قومی ٹیم کے چیف سلیکٹر انضمام الحق نے کہا کہ سرفراز احمد، بابر اعظم، فخر زمان، شاہین آفریدی، شاداب خان اور حسن علی کو آرام دیا گیا ہے جبکہ حسین طلعت کو ڈراپ کیا گیا ہے۔چیف سلیکٹر نے کہا کہ ورلڈ کپ قریب ہے اور اس سے قبل آسٹریلیا کی سیریز بڑی ہے، اس وجہ سے شعیب ملک کو کپتان بنایا تاہم کسی کھلاڑیوں کو فٹنس کی وجہ سے آرام نہیں دیا۔ دوسری جانب قومی ٹیم کے مستقل کپتان سرفراز احمد نے پی سی بی کے سامنے تیور دکھانا شروع کر دیے ہیں۔ ذرائع کے مطابق قومی ٹیم کے کپتان عدم تحفظ کا شکار ہیں۔ سرفراز احمد نے آسٹریلیا کیخلاف سیریز کیلئے ٹیم کا حصہ نہ ہونے کے باوجود متحدہ عرب امارات جانے اور ٹیم کیساتھ رہنے کا مطالبہ کر دیا ہے۔ پی سی بی نے اس حوالے سے فی الحال کوئی حتمی فیصلہ نہیں کیا۔

اس خبر پر اپنی رائے کا اظہار کریں