الطاف حسین کے خلاف موثر کارروائی …. چودھری نثار کا اعلان

لندن (ہاٹ لائن) وفاقی وزیر داخلہ چوہدری نثار علی خان نے الطاف حسین کے خلاف منی لانڈرنگ کیس ختم ہونے پر تشویش کا اظہار کرتے ہوئے کہا ہے کہ ہم بانی متحدہ کے خلاف موثر تحقیقات اور کارروائی چاہتے ہیں۔ ذرائع کا کہنا ہے کہ وفاقی وزیر داخلہ چوہدری نثار علی خان نے لندن میں اپنے برطانوی ہم منصب سے ملاقات کی اور بانی متحدہ الطاف حسین کے خلاف ریفرنس سے متعلق تبادلہ خیال کیا۔ ملاقات کے دوران چوہدری نثار نے الطاف حسین کے خلاف منی لانڈرنگ کیس ختم کرنے پر تشویش کا اظہار کیا اور کہا کہ الطاف حسین کے خلاف موثر تحقیقات اور کارروائی چاہتے ہیں۔ توقع ہے کہ شر انگیز تقاریر کیس میں برطانیہ الطاف حسین کے خلاف اپنے قوانین کے مطابق کارروائی کرے گا۔ ذرائع کا مزید کہنا تھا کہ برطانوی وزیر داخلہ ایمبر روڈ نے چوہدری نثار علی خان کو بانی متحدہ کے خلاف بھرپور کارروائی کی یقین دہانی کرائی ہے۔