دھرنے میں شرکت کیلئےپیدل قافلہ لاہور سے روانہ

لاہور(ہاٹ لائن ) پاکستان تحریک انصاف کے 2 نومبر کو اسلام آباد میں دھرنے میں شرکت کے لئے کارکنوں کا پیدل احتساب مارچ لاہور سے روانہ ہو گیا۔
تحریک انصاف کے اسلام آباد دھرنے مین شرکت کے لئے 25 کارکنوں پر مشتمل دستہ داتا دربار سے وفاقی دارالحکومت کے لئے پیدل روانہ ہوا جس کی قیادت تحریک انصاف کے مرکزی رہنما شبیر سیال کر رہے ہیں جب کہ سینئر رہنما اعجاز چوہدری نے نہ صرف قافلے کو رخصت کیا بلکہ شاہدرہ تک پیدل مارچ میں شریک بھی ہوئے۔
پیدل احتساب مارچ کے شرکا لاہور سے اسلام آباد تک جی ٹی روڈ کا راستہ اختیار کریں گے اور راستے میں دیگر لوگ بھی مارچ میں شامل ہوتے جائیں گے، 6 دن اور 6 راتوں کے سفر کے دوران کامونکی، وزیرآباد، گجرات، جہلم، سوہاوہ اور مندرہ میں رات کو قیام کیا جائے گا، پیدل احتساب مارچ کے شرکا 2 نومبر کو اسلام آباد پہنچیں گے جہاں پی ٹی آئی چیرمین عمران خان ان کا استقبال کریں گے۔