عوامی ٹیکس سے تنخواہیں وصول کرنے والا جوابدہ ہے، فردوس عاشق اعوان

لاہور: وزیراعلیٰ پنجاب کی معاون خصوصی ڈاکٹر فردوس عاشق اعوان کا کہنا ہے کہ جو خواتین میدان میں نکل کر سختیاں نہیں برداشت کرسکتیں انہیں عوامی خدمت نہیں آسان راستہ اختیار کرنا چاہیئے۔

تفصیلات کے مطابق فردوس عاشق اعوان نے سیالکوٹ واقعےپر وزیراعلیٰ پنجاب سے ملاقات کی اور اسسٹنٹ کمشنر کیساتھ رو یے کی وضاحت کی، وزیراعلیٰ پنجاب سے ملاقات کے بعد میڈیا سے گفتگو کرتے ہوئے ڈاکٹر فردوس عاشق اعوان نے کہا کہ وزیراعلیٰ پنجاب نے سیالکوٹ واقعہ پر خود تحقیقات کرنے کا فیصلہ کیا ہے، وزیراعلیٰ واقعےکی آزادانہ ،منصفانہ تحقیقات کرینگے۔

ڈاکٹر فردوس عاشق اعوان نے کہا کہ چیف سیکریٹری کیساتھ غلط بیانی کی گئی اور انہیں حقائق مسخ کرکے بتائےگئے، یہاں کوئی انڈر19میچ کھیل رہا ہے تو کوئی بی جمالو بنا بیٹھا ہے، میں نے وزیراعظم،وزیراعلیٰ سے مشورہ کیا کیسے جواب دینا ہے؟میچ میں اُترنا ہے یا نہیں۔

میڈیا سے گفتگو میں وزیراعلیٰ پنجاب کی معاون خصوصی کا کہنا تھا کہ عوام کی وکالت میں کہیں تلخی اور غصہ آتا ہے، ذاتی رنجش نہیں ہوتی۔ عوامی ٹیکس سے تنخواہیں وصول کرنے والا جوابدہ ہے، جو خواتین میدان میں نکل کر سختیاں نہیں برداشت کرسکتیں انہیں عوامی خدمت نہیں آسان راستہ اختیار کرنا چاہیئے۔