لاہور: آرمی چیف سے مدد کی اپیل کرنے والا بچہ علاج کیلئے سی ایم ایچ منتقل


احسن نے اسپتال سے ہی ویڈیو کے ذریعے آرمی چیف سے مدد کی اپیل کی تھی—

لاہور: دل کے مرض میں مبتلا بچے احسن کو علاج کے لیے کمبائنڈ ملٹری اسپتال (سی ایم ایچ) منتقل کردیا گیا۔
احسن کو سی ایم ایچ کی ایمبولینس میں چلڈرن اسپتال سے شفٹ کیا گیا۔
یاد رہے کہ گذشتہ روز لاہور کے چلڈرن اسپتال میں زیر علاج نویں جماعت کے بچے احسن نے علاج کے لیے آرمی چیف سے مدد کی اپیل کی تھی۔

پنجاب کے علاقے کمالیہ کے رہائشی 14 سالہ احسن نے اسپتال سے ہی ویڈیو کے ذریعے آرمی چیف جنرل قمر جاوید باجوہ اور کور کمانڈر لاہور عامر ریاض سے مدد کی اپیل کرتے ہوئے کہا کہ ‘وہ نویں جماعت کا طالبعم ہے اور لاہور کے چلڈرن اسپتال میں آئی سی یو میں زیرِ علاج ہے’۔

بچے کا کہنا تھا کہ ‘ڈاکٹرز کے مطابق اس کا دل 20 فیصد کام کرتا ہے اور ہارٹ ٹرانسپلانٹیشن کی ضرورت ہے لہٰذ آرمی چیف اور کورکمانڈر لاہور اس کی مدد کریں’۔

بچے کی اپیل کے بعد کمانڈر لاہور لیفٹیننٹ جنرل عامر ریاض نے اسپتال میں احسن سے ملاقات کی تھی، انہوں نے بچے کو گلدستہ پیش کیا اور اس کی جلد صحتیابی کی دعا بھی کی تھی۔

اس موقع پر انہوں نے بچے کو ہر ممکن مدد کی یقین دہانی کرائی تھی، جس کے بعد بچے کو سی ایم ایچ منتقل کردیا گیا۔