2018غیرمعمولی چیلنجز کے ساتھ انتہائی اہمیت کا حامل ہے، آرمی چیف

ڈی جی آئی ایس پی آر میجر جنرل آصف غفور نے ٹوئٹر پر آرمی چیف کا پیغام پہنچایا جس میں ان کا کہنا تھا کہ 2018 میں اندرونی اور بیرونی سطح پر چیلنجز ہوں گے۔

راولپنڈی: نئے سال کی آمد پر اپنے پیغام میں آرمی چیف جنرل قمر جاوید باجوہ کا کہنا ہے کہ 2017 کا یادگار سال اختتام پذیر ہوا اور 2018 غیرمعمولی چیلنجز کے ساتھ انتہائی اہمیت کا حامل ہے۔

آرمی چیف نے کہا کہ پاکستان کے جذبے کی طاقت کوکوئی شکست نہیں دے سکتا، چیلنجز کو مواقع میں تبدیل کیا جاسکتا ہے۔

بعدازاں پاک فوج کے ترجمان نے اپنی ایک اور ٹوئیٹ میں کہا کہ آج ملک بھر میں جو خوشیاں منائی جا رہی ہیں وہ بطور قوم ہمارے عزم اور کامیابیوں کی عکاس ہیں۔

انھوں نے کہا کہ ہم ان خوشیوں کے لیے ان کے شکرگزار ہیں جنھوں نے ہمارے لیے اپنی زندگیوں اور خون کی قربانی دی۔

ڈی جی آئی ایس پی آر کا مزید کہنا تھا کہ ہم اس موقع پر اپنے غازیوں اور شہداء کو یاد کر رہے ہیں اور ان کی قربانیوں پر ان کے شکرگزار ہیں۔

پاکستان میں سال 2018 کا آغاز ہوگیا ہےجس کی آمد پر ملک کے مختلف شہروں میں آتشبازی کا شاندار مظاہرہ کیا گیا۔

دنیا میں سب سے پہلے سال نو کا جشن نیوزی لینڈ کے اسکائی ٹاور سے شروع ہوا جہاں گھڑی پر 12 بجتے ہی شاندار آتش بازی کا مظاہرہ کیا گیا جس سے آسمان رنگ و نور میں نہا گیا۔

آسٹریلیا کے شہر سڈنی ہاربر اور اوپرا ہاؤس پر ہزاروں افراد نے نئے سال کا جشن منایا جہاں آتش بازی کا شاندار مظاہرہ ہوا۔

ادھر چین کے شہر ہانگ کانگ میں بھی نئے سال کا استقبال آتشبازی کے شاندار مظاہرے سے کیا گیا تھا، جہاں وکٹوریا ہاربر پر آتشبازی کے مظاہرے سے پورا آسمان جگمگا اٹھا۔