پاک بحریہ کا سمندر اور خشکی پر ہدف کو نشانہ بنانے والے کروز میزائل کا کامیاب تجربہ

پاکستان نیوی نے اندرون ملک تیار کردہ سمندر اور خشکی پر ہدف کو نشانہ بنانے کی صلاحیت کے حامل کروز میزائل کا کامیاب تجربہ کیا ہے۔

ترجمان پاک بحریہ کے مطابق پاکستان نیوی نے کسی بھی بحری جارحیت کا منہ توڑ جواب دینے کی صلاحیت کا بھرپور مظاہرہ کیا، اور پاک بحریہ کے میزائل کرافٹ پی این یس ’ہمت‘ نے اندرون ملک تیار کردہ ’حربہ نیول کروز میزائل‘ فائر کیا۔

ترجمان پاک بحریہ کے مطابق سطح آب سے سطح آب پر مار کرنے اور زمینی حملے کی صلاحیت کے حامل میزائل نے اپنے ہدف کو کامیابی سے نشانہ بنایا۔

چیف آف د ی نیول اسٹاف ایڈمرل ظفر محمود عباسی نے پی این ایس عالمگیر سے میزائل داغنے کے اس مظاہرے کا مشاہدہ کیا اور نیول فلیٹ کی آپریشنل تیاریوں پر مکمل اطمینان کا اظہار کیا۔

اس موقع پر ایڈمرل ظفر محمود عباسی کا کہنا تھا کہ اندرون ملک دفاعی صلاحیتوں کو مزید فروغ دینے اور بیرونی ممالک پر انحصار کم سے کم کرنے کی ضرورت ہے اور پاک بحریہ پاکستان کے بحری دفاع اور مفادات کو ہر قیمت پر یقینی بنائے گی۔

ترجمان پاک بحریہ کے مطابق نیول چیف نے حربہ نیول ویپن سسٹم پر تحقیق کرنے والے تمام انجینئرز کی کاوشوں کو سراہا۔