ٹرانسپورٹ کے شعبے کی ترقی ہماری ترجیح ہے ،عالمی پائیدار ٹرانسپورٹ کانفرنس بہت اہمیت کی حامل ہے :وزیر اعظم

اشک آباد (ہاٹ لائن)وزیر اعظم نواز شریف نے کہا ہے کہ ٹرانسپورٹ کے شعبے کی ترقی ہماری ترجیح ہے،پائیدار ٹرانسپورٹ سے متعلق عالمی کانفرنس بہت اہمیت کی حامل ہے ،اس کانفرنس کے انعقاد پر ترکمانستان کے صدر کو مبارکباد دیتا ہوں ۔ان کا کہنا تھا کہ ہم بنیادی ڈھانچے کی ترقی پر خصوصی توجہ دے رہے ہیں ۔
ترکمانستان میں عالمی پائیدار ٹرانسپورٹ کانفرنس میں خطاب کرتے ہوئے انہوں نے کہا کہ ایشیائی ترقیاتی بینک کے تعاون سے بنیادی ڈھانچے کی تعمیر جاری ہے ۔ان کا کہنا تھا کہ پاکستان ریلوے کی اپ گریڈ یشن پر کام جاری ہے،2030کے ترقیاتی ایجنڈ ے کے تحت سڑکوں کی تعمیر پر توجہ دے رہے ہیں،مربوط علاقائی رابطوں سے ترقی ممکن ہے ۔ وزیراعظم نے کہا کہ سی پیک وسط ایشیائی ممالک اور چین کے درمیان ایک رابطہ ہے ،اس منصوبے کے ذریعے ہمارے پورٹس تک رسائی آسان ہو گی ۔انہوں نے کہا کہ پاکستان خطے میں رابطے کی اہمیت سمجھتا ہے اس لیے ہمارے مختلف ملکوں کے ساتھ تجارتی راہداری کے معاہدے ہیں ۔نواز شریف نے مزید کہا کہ ملک میں امن ،سیکیورٹی اور ترقی کے لیے ہم کو مل کر کام کرنا ہو گا ،پڑوسی ملک کے ساتھ امن کے بغیر ترقی ممکن نہیں ۔